जन्मभुमि खबर ,
पोखरा ।
अविरल वर्षाका कारण कास्कीको अन्नपूर्ण गाउँपालिका–११ स्थित किम्रुङ खोलामा बाढी आएको छ । बाढीका कारण किम्रुङ खोलामा रहेको पुल बगाएको छ भने तटीय क्षेत्रका घरहरू जोखिममा परेका छन् ।
किम्रुङ खोलाको पुल बगेपछि खोलापारि रहेको बस्तीसँग सम्पर्क टुटेको पालिका अध्यक्ष विष्णुबहादुर केसीले जानकारी दिए । यस्तै, स्याउली बजार क्षेत्रमा रहेको ७ वटा होटलमा पनि पानी पसेको छ ।
कास्कीका प्रमुख जिल्ला अधिकारी कुमानसिंह गुरुङका अनुसार बाढी प्रभावित क्षेत्रमा उद्धार र वस्तुस्थिति बुझ्नका लागि प्रहरी टोली परिचालन गरिएको छ ।
यद्यपि, टाढा र अप्ठ्यारो बाटोका कारण टोलीलाई घटनास्थल पुग्न केही समय लाग्ने उनले बताए । अहिलेको अवस्था संवेदनशील रहेकाले स्थानीयवासीलाई सजग रहन उनले आग्रह गरेका छन् ।
