नवनिर्वाचित सांसद् उपेन्द्र यादवले सांसद् पदको शपथग्रहण गरेका छन् ।
जनता समाजवादी पार्टी (जसपा) नेपालका अध्यक्षसमेत रहेका नवनिर्वाचित सांसद् यादवले सभामुख देवराज घिमिरेबाट सांसद पदको शपथ लिएका हुन् ।
मंगलबार सिंहदरबारमा आयोजित औपचारिक कार्यक्रमबीच उनले शपथग्रहण गरेको सभामुख घिमिरेको सचिवालयले जानकारी दिएको छ ।
यादव बैशाख १० मा भएको उपनिर्वाचनमा बारा क्षेत्र नम्बर २ बाट निर्वाचित भएका हुन् । यादवले जनमत पार्टीका उमेदवार शिवचन्द्र प्रसाद कुशवाहलाई पाँच हजार बढी मतले पराजित गर्दै विजयी भएका हुन् । यादवले २८ हजार ४१५ मत प्राप्त गर्दा कुशवाहले २३ हजार ३३४ मत प्राप्त गरेका थिए ।
गएको मंसिर ४ मा भएको निर्वाचनमा यहाँबाट जसपाकै रामसहाय प्रसाद यादव विजयी भएका थिए । उनी उपराष्ट्रपतिमा निर्वाचित भएपछि यहाँ उपनिर्वाचन गर्नुपरेको हो ।
यता, मंसिरमा भएको निर्वाचनमा भने यादव जनमत पार्टी अध्यक्ष सीके राउतसँग पराजित हुनुपरेको थियो । राउतले ३५ हजार ४२ मत पाउँदा यादवले १६ हजार ९७९ मतमात्र पाएका थिए ।
