जन्मभुमि खबर ,
पोखरा ।
‘टीका, जमरा र चङ्गा चेट, पोखरामा पर्यटकसँग दसैँ भेट’ भन्ने नारासहित बडादसैँको अन्तिम दिन कोजाग्रत पूर्णिमाका अवसरमा आइतबार दसैँ पर्यटन तथा सांस्कृतिक महोत्सव हुँदै छ ।
महिला पर्यटन व्यवसायी मञ्च (ओटेफ) को आयोजनामा फेवाताल किनार बाराही घाटमा हुने महोत्सवको सम्पूर्ण तयारी पूरा भएको शनिबार आयोजित पत्रकार सम्मेलनमा कार्यक्रम संयोजक उमा भण्डारीले जानकारी दिइन् । उनका अनुसार दसैँको सांस्कृतिक र पारिवारिक माहोललाई पर्यटनसँग जोड्दै ‘दसैँ पर्यटन तथा सांस्कृतिक महोत्सव’ पहिलोपटक गर्न लागिएको हो ।
नेपाली मौलिक खानाका परिकार, कलासंस्कृति, परम्परागत सामग्री, स्थानीय उत्पादन तथा पर्यटन सम्बद्ध व्यावसायिक गतिविधि पनि महोत्सवमा समेटिने भण्डारीले बताइन् ।
“दसैँ हाम्रो मौलिक संस्कृति र परम्परासँग जोडिएको पर्व हो । यसलाई पर्यटनसँग जोडेर देशविदेशबाट आएका पर्यटकलाई हाम्रो संस्कृति अनुभव गराउन सकिन्छ । यसबाट विदेशीलेसमेत हाम्रो संस्कृतिको अनुभव गर्न पाउनेछन्”, भुजेलले भने ।
ओटेफका संस्थापक अध्यक्ष जमुना पराजुलीले पोखराको संस्कृति र पहिचानलाई पर्यटकीय उत्पादनका रूपमा चिनाउने अवसर महोत्सवमा मिल्ने बताए ।
ओटेफका अध्यक्ष ममता न्यौपानेले पोखराको प्राकृतिक सुन्दरतासँगै यहाँको कला, संस्कृति र परम्परालाई पनि पर्यटकमाझ पुर्याउन महोत्सव सफल हुने बताए । “हामीले पर्यटकलाई पोखरा घुमाउने मात्रै होइन, पोखराको संस्कृति अनुभूति गराएर फर्काउने वातावरण बनाउनुपर्छ”, उनले भने ।
महोत्सवमार्फत नेपाली मौलिकता अन्तर्राष्ट्रिय पर्यटकमाझ पुर्याउन सकिने भन्दै उहाँले सबै पर्यटनसम्बद्ध संस्था, व्यवसायी, सञ्चार जगत् र सम्पूर्णको साथ आवश्यक रहेको बताए ।
