जन्मभुमि खबर ,
पोखरा ।
पोखराको प्याराग्लाइडिङ पहिलाकै स्थान सराङकोटबाट बाट नै हुने भएको छ । पोखरा अन्तर्राष्ट्रिय विमानस्थल सञ्चालनमा आएसँगै सराङकोटबाट पश्चिमतर्फ धकेलिएको प्याराग्लाइडिङ पुनः पूर्वतर्फ सरेको छ । नागरिक उड्डयन प्राधिकरणले साविकको अवतरणस्थल खपौदी (इन्ड अफ दी लेक) मा बिहीबारबाट अवतरणका लागि अनुमति दिएको हो ।
पहिला सराङकोटबाट प्याराग्लाइडिङ उडान सुरू भएर फेवातालमाथि उड्दै खपौदीमा अवतरण हुन्थ्यो । विमानस्थल सञ्चालनमा आएसँगै सराङकोटबाट उडान (टेकअफ) स्थल ५ किलोमिटर हवाई दूरीमा पश्चिमतर्फ मान्द्रेढुंगामा सरेको थियो । अवतरणस्थल खपौंदीबाट पामेमा सरेको थियो । प्राधिकरणले सुरक्षाको कारण देखाउँदै प्याराग्लाइडिङको उडान र अवतरणस्थल सारेको थियो ।
नेपाल हवाई खेलकुद संस्था (ना) का उपाध्यक्ष खेमराज आचार्यका अनुसार विमानस्थल सञ्चालनमा आउनुअघि दैनिक १ हजार पर्यटकले प्याराग्लाइडिङ गर्ने गरेकोमा उडान र अवतरणस्थल सरेपछि १ सयजनामा सीमित हुन पुगेको थियो । चार सयको संख्यामा रहेका प्यारा पाइलट घटेर २ सय ५० मा झरेका थिए । ६३ बटम प्याराग्लाइडिङ कम्पनीमध्ये १० वटा विस्थापित भएका थिए ।
