तनहु बन्दीपुर गाँउपालिका–१ बनियाटारमा बाघको आक्रमणबाट घाइते भएका तीन वर्षीय बालक शुलभ परियारको चितवन मेडिकल कलेजमा सफल शल्यक्रिया भएको छ । बुधबार साँझ ५ बजेको समयमा घरको पिँडीमा खेलिरहेका बालकको चितुवाले आक्रमण गरेको थियो ।
बालककी आमा आलु छिल्कदै गर्दै ‘बाट बाट’ भन्ने छोराको आवाज सुनेको र बाहिर निस्किदा छोरालाई बाघले घिसार्दै गरेको देखेपछि चिलाउनेको दाउरो हातमा समातेर बाघको मुखबाट बच्चा खोस्न गएको उनले सुनाइन् ।
बालककी आमासँगै अन्य स्थानीयहरु करिब ५० मिटर टाढा पुगेर छोरालाई खोसेर ल्याउन सफल भएको लक्षमीले स्मरण गरेकी छन् । तत्काल बन्दीपुरको स्थानीय अस्पतालमा लैजादा त्यहाँ सामान्य ड्रेसिङ मात्र गरेर चितवनको चितवन मेडिकल कलेज रिफर गरेको थियो ।
त्यस लगतै चितवन मेडिकल आएका उनीहरुले छोराको घाँटीमा बाघको नङ्ग्रा गाढेको थाहा पाएपछि उनको तत्काल अप्रेसन गरिएको थियो । बालकको आज बिहीबार मात्रै अप्रेसन गर्न सफल भएको बालककी आमा बताउछन् ।
घाइते बालकको घाँटी तथा शरीरका अन्य भागमा घाउ लागेको छ । केही महिनाअघि मात्रै बन्दीपुर–१ का पाँच वर्षीय सुप्रिम बगालेको चितुवाको आक्रमणमा परी मृत्यु भएको थियो । उक्त घटनामा एक बालिकासहित दुईजना चितुवाको आक्रमणबाट घाइते भएका थिए ।
