जन्मभुमि खबर ,
पोखरा ।
त्रिभुवन अन्तर्राष्ट्रिय विमानस्थलबाट साढे ६ केजी सुन बरामद गरेको छ ।
शनिबार राति प्रहरीले साढे ६ केजी सुन बरामद गरेको हो । फ्लाइ दुबईबाट शनिबार राति काठमाडाैं आएका विदेशी नागरिकलाई प्रहरीले साढे ६ केजी सुनसहित पक्राउ गरेकाे हाे ।
सुनसहित इजिप्टका नागरिक सेरिफ मोहम्मद ल्यासिन र अन्य दुई सुडानी नागरिक पक्राउ परेका छन् ।
त्रिभुवन विमानस्थलका प्रहरी प्रमुख डीआइजी अर्जुन चन्द ठकुरीका अनुसार शनिबार राती पौने एक बजे भन्सार पास भइसकेपछि सुन बरामद भएको हो । ‘हामीलाई पहिले सुराकी पनि थियो । बिहीबार जस्तै ज्याकेटभित्रको वस्त्रमा ६ थान अर्धतरल सुन ल्याएका रहेछन्’ चन्दले भने ।
फ्लाइ दुबईको एफ जेड ५७३ को फ्लाइटबाट सुन ल्याइएको थियो । मोहम्मदसँगै आएका भएकाले दुई सुडानीलाई आशंकामा पक्राउ गरिएको चन्दले बताए ।
यसअघि दुई दिन अघि मात्रै १४ किलो सुन समातिएको थियो । सुनसहित पक्राउ परेका व्यक्तिलाई गौशाला प्रहरी वृत्त लगिएको छ ।
