जन्मभुमि खबर ,
पोखरा ।
विश्व पर्यटन दिवसका दिन लेकसाइडमा मिनी सडक महोत्सव हुने भएको छ। लेकसाइडको बाराहीचोकदेखि खहरेचोकसम्म यातायात रोकेर सडक महोत्सव गर्न लागिएको पोखरा पर्यटन परिषदका अध्यक्ष पोमनारायण श्रेष्ठले बताए ।
‘सडकमै खाउँ, सडकमै रमाउँ भनेर पर्यटन दिवसमा सडक महोत्सव आयोजना गरेका छौं,’ श्रेष्ठले भने, ‘सडक महोत्सवले पर्यटकलाई आकर्षण गर्ने हाम्रो अपेक्षा छ ।’
महोत्सवमा नेपाल र भारतका सांस्कृतिक कार्यक्रम प्रस्तुत गर्ने कार्यक्रम रहेको छ। महोत्सवमा नेपालका विभिन्न साँकृतिक झाँकीसहित र्यालीको आयोजना गरिएको श्रेष्ठले बताए ।
रेष्टुरेन्ट एन्ड बार एसोसिएसन अफ नेपाल (रेवान)को आयोजनामा सडक महोत्सव गर्न लागिएको हो। अंग्रेजी नयाँ वर्षका अवसरमा पोखरामा आयोजना हुने सडक महोत्सव चर्चित छ। सोही प्रकारको मिनी महोत्सव आयोजना गर्न लागिएको रेवान पोखराका अध्यक्ष नरेश भट्टराईले बताए ।
पर्यटन दिवसका अवसरमा भारतका टुर अपेरटर र सञ्चारकर्मीसँग पोखरामा अन्तर्क्रियासमेत आयोजना गरिएको छ। उक्त कार्यक्रममा नेपालका लागि भारतीय राजदूत नवीन श्रीवास्तव पनि सहभागी हुने परिषद् अध्यक्ष श्रेष्ठले जानकारी दिए ।
भारतीय टुर अपरेटर र सञ्चारकर्मीलाई मुक्तिनाथ र गोरखा घुमाउने योजनासमेत छ। भारतीय पर्यटकलाई आकर्षित गर्न उक्त कार्यक्रम राखिएको आयोजकले बताएको छ ।
यही असोज १० गते ‘पर्यटन र हरित लगानी’ भन्ने नाराका साथ विश्वभर ४४ औं विश्व पर्यटन दिवस मनाइँदैछ। दिवसका अवसरमा ट्रेकिङ एजेन्सी एसोसिएसन अफ नेपाल (टान) पोखराले पदयात्रा कार्यक्रम राखेको छ। दिवसका अघिल्लो दिन असोज ९ मा पोखराकै मार्गीदेखि पुम्दीकोटसम्म एक दिने पदयात्रा राखेको टान अध्यक्ष धर्म पन्थीले बताए ।
गण्डकी सरकारले विश्व पर्यटन दिवस प्रदेशको ११ वटै जिल्लामा मनाउने तयारी गरेको छ । पर्यटकलाई स्वागतदेखि अन्तक्रियात्मक कार्यक्रम राखेर दिवस मनाउन लागिएको पर्यटन मन्त्रालय गण्डकीका सचिव कुमानसिंह गुरूङले जानकारी दिए ।
प्रदेशले ग्रामीण पर्यटन प्रवर्द्धन र पर्यटकीय पूर्वाधारमा लगानी गरेको उनले बताए ।
गण्डकीका ११ जिल्लामा पर्यटकीय गन्तव्य बनाउन प्रदेशले विस्तृत परियोजना प्रतिवेदन र वातावरणीय अध्यन गरिरहेको छ। जसमध्ये ६ वटा गन्तव्यको परियोजना तयार भएर कार्यान्वयनमा गएको सचिव गुरूङले बताए ।
