लमजुङ कारागारबाट फरार भएका दुई कैदीमध्ये एक जनालाई प्रहरीले पक्राउ गरेको छ ।
गएराति २ बजे कारागारको उत्तर-पश्चिमतर्फको कैदी आवासको पर्खाल नाघेर २ कैदी फरार भएका थिए । फरारमध्ये जबरजस्ती करणी मुद्दाका मध्यनेपाल नगरपालिका ४, लमजुङका २७ वर्षीय विनोद विकलाई पक्राउ गरिएको प्रहरीले जनाएको छ ।
प्रहरीका अनुसार बेसीसहर नगरपालिका २, चिसापानीको जंगलमा हिँडिरहेको अवस्थामा विकलाई फेला पारेर पक्राउ गरिएको हो ।
ठगी मुद्दामा पुर्पक्षका लागि कारागार चलान भएका गोरखा चुमनुब्री गाउँपालिका ३ का ३७ वर्षीय चन्द्रबहादुर गुरुङ अझै फरार छन् । उनको खोजी भइरहेको लमजुङका प्रहरी प्रमुख (डीएसपी) प्रकाश श्रीमलले जानकारी दिए ।
