जन्मभुमि खबर ,
पोखरा ।
पोखरामा स्नुकर हाउस सञ्चालनको आवरणमा अवैध लागु औषध खैरो हेरोइनको कारोबार गरेको आरोपमा तीन जनालाई प्रहरीले पक्राउ गरेको छ। लागु औषध नियन्त्रण ब्यूरोको पोखरा शाखाबाट खटिएको टोलीले ११२.५३ ग्राम खैरो हेरोइनसहित तीन जनालाई नियन्त्रणमा लिएको हो।
पक्राउ पर्नेहरूमा पोखरा महानगरपालिका वडा नं. १५ स्थित ‘सोनम स्नुकर हाउस’ का सञ्चालक ३७ वर्षीय गोबिन्द थापा, उनका दाजु ३८ वर्षीय रुम बहादुर थापा र सोही स्नुकर हाउसमा कार्यरत कामदार ३२ वर्षीय सुरज सुनार रहेका छन्।
पक्राउ परेकामध्ये मुख्य सञ्चालक गोबिन्द थापा पुराना लागु औषध कारोबारी भएको समेत खुलेको प्रहरीको भनाइ छ। उनी यसअघि पनि लागु औषध मुद्दामा ३० महिना कैद र १ लाख ५० हजार रुपैयाँ जरिवाना भुक्तान गरिसकेका व्यक्ति हुन्।
प्रहरीले उनीहरूको साथबाट खैरो हेरोइनका साथै ६ लाख ७ हजार रुपैयाँ नगद, ५ थान मोबाइल सेट (जसमा एउटा आइफोन १३ प्रो म्याक्स रहेको छ) र दुई थान डिजिटल तराजु समेत बरामद गरेको छ।
लागु औषध नियन्त्रण ब्यूरोका प्रवक्ता एवं प्रहरी उपरीक्षक दुर्गा राज रेग्मीले पक्राउ परेका तीनै जनालाई आवश्यक कानुनी कारबाही र थप अनुसन्धानका लागि जिल्ला प्रहरी कार्यालय कास्की, पोखरामा बुझाइएको बताए ।
