जन्मभुमि खबर ,
पोखरा ।
करिब १ महिना अघि पोखरा महानगरपालिका १७ ड्यामसाइडमा शङ्कास्पद सुटकेस फेला पर्यो । खोलेर हेर्दा उक्त सुटकेसमा महिलाको शव भेटियो।
अन्दाजी २२ देखि २५ वर्ष उमेरकी महिलाको पहिचानका लागि प्रहरीले तस्बिर सार्वजनिक गरेको छ । हालसम्म ती महिलाको पहिचान नखुलेको कास्की प्रहरीले जनाएको छ ।
महिलाको घाँटीमा धारिलो हतियारले रेटेर हत्या गरिएको प्रहरीको प्रारम्भिक रिपोर्टले देखाएको छ । प्रहरीले पहिचानका लागि विभिन्न माध्यमहरूको प्रयोग गरेको छ ।
महिलाको पहिचान नखुलेको मात्रै होइन, घटनामा संलग्नहरूको समेत पत्तो लागेको छैन । एक पुरुष पक्राउ परेका छन् । उनीमाथि अनुसन्धान भइरहेको प्रहरी प्रवक्ता डीएसपी हरीबहादुर बस्नेतले जानकारी दिए ।
‘घटनामा संलग्न भएको आशङ्कामा एक जनालाई नियन्त्रणमा लिएर अनुसन्धान गरिरहेका छौँ,’ उनले भने, ‘अरू पनि संलग्न छन् भन्ने प्रारम्भिक रिपोर्टले देखाएको छ । हामी खोजी गरिरहेका छौँ ।’
मृतकको हुलिया सार्वजनिक गरे पनि हालसम्म कोही आफन्त सम्पर्कमा नआएकाले प्रहरीले देशभरका प्रहरी युनिटहरूमा हुलिया परिपत्र गरेको र अन्य संलग्नहरूको खोजी कार्य जारी राखेको बस्नेतले बताए।
