जन्मभुमि खबर ,
पोखरा ।
बागलुङमा सोमबार बिहान एउटा पिकअप भ्यान दुर्घटना भएको छ । दुर्घटनामा परी भ्यानमा सवार पाँचजनाको मृत्यु भएको प्रहरीले जनाएको छ ।
ग२च ९२४७ नम्बरको भ्यान सडकदेखि १०० मिटरभन्दा तल खसेको जिल्ला प्रहरी कार्यालय बागलुङका प्रहरी निरीक्षक केशव थापाले बताए ।
बागलुङको जैमिनी नगरपालिका–८, छिस्तीबाट सदरमुकाम बागलुङ बजारतर्फ आउँदै गरेको भ्यान दुर्घटना भएको हो । जैमिनी–७, जैदीको व्यार्थलामा भ्यान दुर्घटना भएको प्रहरीले जनाएको छ ।
मृत्यु हुनेमा बागलुङ जैमिनी-८ केवई बस्ने ३८ वर्षीय चालक महेन्द्र पुन, २० वर्षीया रश्मी श्रीष, ५० वर्षीय नन्दकली पुन, १७ वर्षीय निरज श्रीष र ७५ वर्षीय कुलप्रसाद श्रीषको मृत्यु भएको हो ।
दुर्घटनामा केवई बस्ने ४५ वर्षीय गंगाबहादुर श्रीष घाइते छन् ।
उनको शरीरको विभिन्न भागमा चोट लागेको छ। उनको अवस्था मध्यम छ ।
