जन्मभुमि खबर ,
पोखरा ।
सर्वोच्च अदालतले मेडिकल व्यवसायी दुर्गा प्रसाईंलाई थुनामा राख्नुको कारण सोधेको छ। रिटमाथि सुनुवाइ गर्दै न्यायाधीश प्रकाशमान सिंह राउतको एकल इजलासले प्रसाईंलाई थुनामा राख्नुको कारणसहित लिखित जवाफ पेश गर्न विपक्षीका नाममा आदेश जारी गरेको हो ।
प्रधानमन्त्री तथा मन्त्रिपरिषदको कार्यालय, गृह मन्त्रालय, प्रहरी प्रधान कार्यालय , प्रहरी प्रधान कार्यालय साइबर ब्यूरो र काठमाडौं जिल्ला अदालतलाई निवेदनमा विपक्षी बनाइएको छ ।
प्रसाईंको स्वास्थ्य अवस्थाको कारण देखाउँदै सोमबार उनका छोरा निराजन प्रसाईंले सर्वोच्च अदालतमा बन्दी प्रत्यक्षीकरणको रिट निवेदन दर्ता गराएका थिए। निवेदनसँगै प्रसाईंले आफू क्यान्सरबाट पीडित भएको भन्दै मेडिकल रिपोर्ट पनि बुझाएका थिए ।
प्रहरीको साइबर ब्युरोले प्रसाईंलाई आइतबार भक्तपुरस्थित उनको निवासबाट पक्राउ गरेको थियो। उनलाई जिल्ला अदालत काठमाडौंले तीन दिन हिरासतमा राखेर अनुसन्धान गर्न प्रहरीलाई अनुमति दिइसकेको छ। उनी हाल प्रहरी हिरासतमा छन्।
उनीविरुद्ध विद्युतीय कारोबार ऐनअन्तर्गतको कसूरमा अनुसन्धान सुरू भएको छ। झन्डै १५ दिन अगाडि उनीविरुद्ध प्रहरीको साइबर व्युरोमा उजुरी दर्ता भएको थियो।
