![](https://janmabhumikhabar.com/wp-content/uploads/2024/06/PicsArt_06-11-12.08.57-750x430.jpg)
जन्मभुमि खबर ,
पोखरा ।
पोखरा महानगरपालिका–१७ घारिपाटनमा घरको ढोका फुटाएर सुनका गहनासहित एक करोड बढी मूल्यका सामान चोरी गर्ने दुई पक्राउ परेका छन् ।
चोरीको आरोपमा पोखरा महानगरपालिका–२२ का २१ वर्षीय नविन नेपाली र गोरखा घर भई पोखरा महानगरपालिका–४ गैह्रापाटन बस्ने २९ वर्षीय सुवास थापा मगर सोमबार पक्राउ परेका हुन् । उनीहरूले लक्ष्मीकान्त शर्मा र सोही घरमा डेरा गरी बस्ने कृष्ण पौडेलको कोठाको ढोका फुटाएर ४२ तोला सुनका गहना, मोबाइल, ल्यापटप, क्यामेरालगायत सामान चोरी गरेका थिए ।
त्यस्तै नगद ३ लाख ८० हजार गरेर एक करोड बढीका सरसामान चोरी गरेको प्रहरीले जानकारी दिएको छ ।
उनीहरूको साथबाट २४ तोलाका सुनका गहना, २२ वटा मोबाइल, ९ वटा क्यामेरा, १५ वटा ल्यापटप, ११ वटा घडी, दुई वटा ड्रोन, दुई वटा वाकीटकीलगायत समान बरामद भएको छ । उनीहरूलाई कास्की जिल्ला अदालतबाट चोरी तथा डाँका मुद्दामा सात दिन म्याद थप गरी अनुसन्धान प्रक्रिया अगाडि बढाइएको प्रहरीले जनाएको छ ।