जन्मभुमि खबर,
पोखरा ।
सिन्धुपाल्चोकको पिस्कर धारावतीमा जन्ती बोकेको बस दुर्घटना हुँदा तीन जनाको घटनास्थलमै मृत्यु भएको छ । घटनामा अरु ५२ जना जन्ती घाइते भएका छन् ।
दोलखाबाट जन्ती लिएर आउँदै गरेको रोल्वालिङ यातायातको वा ४ ख ५६१६ नम्वरको बस त्रिपुरा सुन्दरी गाउँपालिका ५ धारावतीमा शुक्रबार बिहान ७ बजेतिर दुर्घटनामा परेको जिल्ला प्रहरी कार्यालयले जानकारी दिएको छ ।
सो दुर्घटनामा घाइते भएकाहरूको उद्धार कार्य भइरहेको र घाइतेलाई उपचारका लागि अस्पताल पठाउन थालिएको जिल्ला प्रहरी कार्यालयका डिएसपी निरञ्जन भट्टराईले जानकारी दिए ।
मृत्यु हुनेमा दोलखाको भीमेश्वर नगरपालिपका-१ सुस्पाका मान बहादुर थामी ,शिव श्रेष्ठ र दिपेन्द्र थामी रहेका छन् ।
उनका अनुसार बस ठूलो भिरबाट खसेको र भौगोलिक अवस्था कठिन भएकाले उद्धार कार्यमा समस्या परेको छ ।
भिमेश्वर- १ बाट स्थानीय शुसिल थामीको विवाहको लागि दोलखाबाट बिहान साढे ३ बजे जन्ती बोकेर बस हिँडेको घाइते एन्जिला थामीले बताइन् । सडक नै भासिएर दुर्घटना भएको उनले बताइन्। उनका अनुसार बस चालकले मादक पदार्थ सेवन गरेका थिएनन् ।
