जन्मभुमि खबर ,
पोखरा ।
धादिङको निलकण्ठमा आइतबार ट्रक दुर्घटनामा मृत्यु भएका बालकको पहिचान खुलेको छ ।
दुर्घटनामा मृत्यु हुनेमा १० बर्षीय बालक सन्तोष रम्तेल रहेका छन्। दुर्घटनामा गम्भीर घाइते उनलाई उपचारका लागि अस्पताल पुर्याउँदा डाक्टरले मृत घोषणा गरेका जिल्ला प्रहरी कार्यालय धादिङले जनाएको छ ।
प्रहरीका अनुसार दुर्घटनामा घाइते भएका सबैको पहिचान भएको छ। घाइते हुनेमा ट्रक चालक ३५ वर्षीय विष्णु सिर्मलको अवस्था गम्भीर रहेको प्रहरीले जनाएको छ ।
यस्तै, ट्रकमा सवार १३ बर्षीय कृष्ण रम्तेल र १४ बर्षीय सुदीप मजरकोटीको अवस्था पनि गम्भीर रहेको जिल्ला प्रहरी कार्यालय धादिङका प्रहरी नायव उपरीक्षक मकेन्द्रकुमार मिश्रले जानकारी दिए ।
दुर्घटनामा मृतक सन्तोष रम्तेलका बुवा ४० बर्षीय राम रम्तेल, ३५ बर्षीय हिरा रम्तेल, ११ बर्षीय सुजन रम्तेल, १० बर्षिय प्रितम मजरकोटी र १० बर्षीय बिमल मजरकोटीको अवस्था सामान्य रहेको मिश्रले बताए ।
सामान्य घाइतेहरुको जिल्ला अस्पताल धादिङमा उपचार भैरहेको छ भने गम्भीर घाइतेहरुलाई काठमाडौँ रिफर गरिएको छ ।
उनीहरु एकै परिवारको सदस्य रहेको प्रहरीले जनाएको छ। आइतबार बिहान ९ बजेतिर निलकण्ठ नगरपालिका–५ खाल्टेको पतेनीबाट बेँसीतर्फ जाँदै गरेको बा ३ ख ८९४७ नम्बरको ट्रक दुर्घटनामा परेको हो। घटनाबारे थप अनुसन्धान भैरहेको प्रहरीले जनाएको छ ।
