जन्मभुमि खबर ,
पोखरा ।
नेपाल भ्रमणमा आएका जापानी नागरिकलाई लिएर पोखरा पुगेका नेपाली ‘गाइड’ र पर्यटकमाथि दुर्व्यवहार भएको छ ।
२ जापानी नागरिकलाई भ्रमणका लागि लिएर पोखरा पुगेका गाइड टिएन भट्ट र पर्यटक माथि नै विमानस्थलको पार्किङमा रहेका ट्याक्सी चालकले दुर्व्यवहार गरेका हुन् ।
भट्ट र २ जापानी नागरिक सोमबार बिहान हवाइमार्फत पोखरा पुगेका हुन् । पोखरा ओर्लिनासाथ होटलमा जानका लागि ट्याक्सी बुक गर्ने क्रममा गाइड भट्टले राइड सेयरिङ एप इन्ड्राइभमार्फत ट्याक्सी बोलाए । नजिकै भएकाले छोटो समयमै ट्याक्सी पनि अयो । त्यसपश्चात सामान हालेर होटलतर्फ जाने तयारी गरेका उनीहरुमाथि नजिकै रहेका ट्याक्सी चालकहरुले दुर्व्यवहार गरेको भट्टले बताए ।
‘पर्यटकलाई लिएर बुक गरेको होटलमा जान लागेका थियौँ । इन्ड्राइभ बुक गरेर सामान लोड गर्दै थियौँ । तीनजना आएर हामीमाथि हातपात गरे ।’, भट्टले भने ।
भट्टले उपलब्ध गराएको भिडियाेमा पर्यटक लिएर पोखरा पुगेका भट्टको सामानसमेत उनीहरुले लोड गरेको ट्याक्सीबाट निकालिदिएकाे देखिएकाे छ ।
दुर्व्यवहारमा परेकाहरूले आफूहरुमाथि इन्ड्राइभको ट्याक्सी प्रयोग गरेको भन्दै अपरिचित व्यक्तिहरूले अश्लिल शब्दले गाली गरेको समेत बताएका छन् । आफूहरुमाथि दुर्व्यवहार भएको भन्दै उनीहरुले प्रहरीमा उजुरी गरेका छन् ।
