जन्मभुमि खबर ,
पोखरा ।
पोखरा महानगरपालिकामा जुवा तास खेलिरहेको अवस्थामा १२ जनालाई नेपाल प्रहरीले पक्राउ गरेको छ । पोखरा महानगरपालिका-११ धरहरा मार्ग बस्ने ४८ वर्षीय किसान पुनको सोही ठाउँस्थित खाजा घरमा लुडो खेलिरहेको अवस्थामा पुन समेत ५ जना पक्राउ परेका हुन् ।
जिल्ला प्रहरी कार्यालय कास्कीबाट खटिएको टोलीले उनीहरूलाई नगद ७२ हजार २ सय २५ रुपैयाँ, खेलमा प्रयोग हुने गोटी १६ वटा र डाइस १ वटासहित पक्राउ गरेको प्रहरीले जानकारी दिएको छ । उनीहरूलाई शनिबार साँझ प्रहरीले पक्राउ गरेको हो ।
यसैगरी पोखरा महानगरपालिका-१२ प्रगति टोल डेरा गरी बस्ने तनहुँ भानु नगरपालिका-८ तुरतुरे घर भएका ६६ वर्षीय नर बहादुर गुरुङको कोठामा जुवा तास खेलिरहेको अवस्थामा गुरुङ समेत ७ जनालाई शनिबार साँझ प्रहरीले पक्राउ गरेको छ । जिल्ला प्रहरी कार्यालय कास्कीबाट खटिएको प्रहरीले उनीहरूलाई नगद ६६ हजार ४ सय ३५ रुपैयाँ र ४ बुक ताससहित पक्राउ गरेको हो । यस सम्बन्धमा प्रहरीले आवश्यक अनुसन्धान गरिरहेको छ ।
