जन्मभुमि खबर ,
पोखरा ।
रोजगारीको सिलसिलामा मलेसियामा काम गर्दै आएका झापा शिवसताक्षी–३ का धनबहादुर प्रधानको हत्यामा संलग्न रहेको आरोपमा एक जना पक्राउ परेका छन्।
गत मंसिर २५ गते एउटै कम्पनीमा कार्यरत एक नेपालीले हत्या गरेर नेपालतर्फ फरार भएको भन्ने सूचनाका आधारमा प्रहरीले विमानस्थलबाट पक्राउ गरेको हो।
प्रहरीले महोत्तरीको गौशाला नगरपालिका–५ का अनिल कुमार साहलाई शनिबार त्रिभुवन अन्तर्राष्ट्रिय विमानस्थलबाट पक्राउ गरेको हो।
जिल्ला प्रहरी परिसर, काठमाडौँका अनुसार ती व्यक्ति आफ्नो हुलिया परिवर्तन गरेर हिमालयन एयरलाइन्सबाट नेपाल आएका थिए।
मृतक प्रधानकी श्रीमतिले दिएको जाहेरीमा जिल्ला अदालत काठमाडौँमा मुद्दा समेत दर्ता भएको छ। यो मुद्दामा अदालतबाट ५ दिनको म्याद लिई इन्टरपोलमार्फत मलेसिन प्रहरी र नेपाली राजदूतावाससँग समेत समन्वय गरेर अनुसन्धान अघि बढाइएको प्रहरीले बताएको छ।
मुलुकी अपराध संहिताले दिएको बहिर्क्षेत्रीय अधिकारको प्रयोग गरेर उनलाई पक्राउ गरिएको प्रहरीले जनाएको छ।
