जन्मभुमि खबर ,
पोखरा ।
इन्टरकलेज ब्यान्ड कम्पिटिसनमा पोखरा लिङ्कन कलेजको ‘द लिङ्कन’ ब्यान्ड पहिलो भएको छ ।
पोखरा सांगीतिक कलाकार संघ आयोजनामा पोखरामा पहिलो पल्ट भएको प्रतियोगितामा उत्कृष्ट प्रस्तुति आधारमा द लिङ्कन ब्यान्ड प्रथम हुँदै १ लाख जितेको छ ।
यस्तै, इन्फोमेटिक्स कलेजको ‘द इन्टरभल्स’ व्यान्ड दोस्रो र ग्लोबल कलिजियटको उत्वेग ब्याण्ड तेस्रो भयो । उनीहरुले क्रमशः ५० र २५ हजार प्राप्त गरे । १८ कलेजका २१ ब्यान्डले भाग लिएको प्रतियोगिताको फाइनल राउण्डमा १० ब्याण्ड पुगेका थिए ।
उत्कृष्ट भोकलमा पोखरा लिङ्कनका रोमित गुरुङ, लिड गिटार कालिका माविका अनमोल थापा, रिदम गिटारमा इन्फोमेटिक्स कलेजका सन्दीप आले मगर, बेस गिटारमा ग्लोवल कलेजियटका अनुपम रिजाल र ड्रमरमा पोखरा लिङ्कनका विनोद सुनार उत्कृष्ट घोषित भए । विधागततर्फका उत्कृष्टलाई जनही ५ हजार साथमा प्रमाणपत्र दिइयो ।
विजयीलाई गण्डकी प्रज्ञा प्रतिष्ठानका उपकुलपति गोरे गुरुङ, पोखरा सांगीतिक कलाकार संघका अध्यक्ष हर्कराज गुरुङ (भाइ), निवर्तमान अध्यक्ष सुनिल थापा, संस्थापक अध्यक्ष श्यामसुङ गुरुङ, सल्लाहकार तीर्थ तामाङ र शेरबहादुर गुरुङ, संघका उपाध्यक्ष टोपबहादुर खत्री, सचिव भाष्करध्वज श्रेष्ठ, सहसचिव विनोद बानियालगायतले पुरस्कार वितरण गरे ।
समापनमा पोखरा महानगरपालिका प्रमुख धनराज आचार्यले कला र संगीत देशको पहिचान र सभ्यतासँग जोडिने भन्दै यसको संरक्षण र विकासमा महानगरले सघाउने बताए । उनले विगतमा ब्यान्डहरुको राजधानी बनेको पोखराको त्यो विरासत फर्काउनुपर्ने र त्यसका लागि महानगरले सहयोग गर्ने प्रतिबद्धतासमेत जनाए ।
गण्डकी प्रज्ञा प्रतिष्ठानका सदस्य सचिव मनकुमार श्रेष्ठले पोखरा ब्यान्ड नै ब्यान्डहरुको सहर भएको बताए । निबार भाष्करध्वज श्रेष्ठको डि–मर्चा ब्यान्ड र शान्तराज बज्राचार्यको देउराली ब्यान्डको विशेष प्रस्तुतिमा दर्शक झुमेका थिए ।
