जन्मभुमि खबर ,
पोखरा ।
पोखराको हट एयर बलुन आगामी सेप्टेम्बर १ देखि पुनः सञ्चालनमा आउने भएको छ । मनसुनका कारण करिब तीन महिना रोकिएको थियो ।
हट एयर बलुन साहसिक पर्यटकीय खेल हो । पछिल्लो समय साहसिक पर्यटनका पारखीहरूको रोजाइमा यो खेल परेको बलुन नेपालका अध्यक्ष विक्रम बादेले बताए ।
करिब ६ हजार फिट माथिसम्म बेलुनमा उड्दा माछापुच्छ्रे, अन्नपूर्ण लगायतका हिमालहरू देख्न सकिन्छ । पूर्ण आकारको फेवाताल, पुम्दिकोट महादेव, सराङकोट मान्द्रेढुंगा तथा पोखरा उपत्यका आसपासको सुन्दर दृश्यावलोकन गर्न सकिन्छ ।
विगतमा एक मात्रै बेलुन उडाइरहेको यस कम्पनीले अब भने दुईवटा उडाउने भएको छ । अमेरिकी र भियतनामी गरेर दुई पाइलटले बलुन उडाउने बादेले बताए ।
पोखराको पामेबाट बलुन उडान हुने बादेले जानकारी दिए । उनका अनुसार बिहान र बेलुका गरी दुई सिफ्टमा बलुन उडाइनेछ ।बिहान ५ बजेदेखि ९ बजेसम्म र दिउँसो ३ बजेदेखि बेलुका ६ बजेसम्म उडान हुने उनले बताए ।
कम्पनीका अनुसार तीन वर्ष उमेर कटेका नागरिकले हट एयर बलुनमा उड्न सक्नेछन् ।
कति लाग्छ शुल्क ?
हट एयर बलुनमा उड्नका लागि नेपाली पर्यटकलाई ९ हजार ५०० रुपैयाँ शुल्क लाग्नेछ । सार्क मुलुकका पर्यटकका लागि १०० डलर र अन्य मुलुकका नागरिकलाई १३० डलर शुल्क कायम गरिएको छ ।
उक्त शुल्क तिरेपपछि उडानसँगै ब्रेकफास्ट, लेकसाइडदेखि पामेसम्म्को दुइतर्फी यातायात सुविधा र प्रमाणपत्र समेत दिइन्छ ।
नेपाली पर्यटकले रिजर्भ गरी प्राइभेट उडान गर्न चाहे आधा घन्टाको ५५ हजार र एक घन्टाको ८० हजार रुपैयाँ तोकिएको छ ।
