मंगलबार परराष्ट्र मन्त्रालयले काठमाडौंस्थित भारतीय दूतावासमार्फत तटबन्ध निर्माण तत्काल रोक्न भारतलाई कूटनीतिक नोट पठाएको परराष्ट्र मन्त्रालयकी प्रवक्ता सेवा लम्सालले जानकारी दिइन् ।
सरकारले महाकालीलाई नेपाली भूमितर्फ धकेल्ने गरी निर्माण भइरहेको तटबन्ध र त्यसलाई लिएर दार्चुलामा रहेका नेपाली नागरिकमाथि भारतीय पक्षले गरेको ज्यादती रोक्न पनि भारतलाई आग्रह गरेको छ ।
नेपालले पठाएको कूटनीतिक नोटमा नेपालको सहमतिबिना बनाइएको संरचना र यसले नेपालतर्फ पुगेको क्षति उल्लेख गर्दै सीमा क्षेत्रमा संरचना निर्माण गर्नुपरे दुवै देशको सहमति र समन्वय हुनुपर्ने उल्ल्खे छ । भारतले सीमानदी महाकाली नदी किनारमा एकतर्फी रूपमा एक वर्षयता तटबन्ध निर्माण गरिरहेको छ । भारतको तटबन्ध निर्माणको कामलाई नरोकेपछि दार्चुलाका स्थानीयबासीले विरोध जनाउँदै आएका छन् ।
भारतले महाकाली नदी किनारमा तटबन्ध बनाउने क्रममा नदीको बीचमा बनाएको संरचना नहटाउँदा नदीको धार नेपालतिर फर्किएको छ । महाकालीको धार नेपालतिर फर्किँदा दार्चुला सदरमुकाम नै जोखिममा पर्ने स्थिति आएपछि स्थानीय बासिन्दा विरोधमा उत्रिएका छन् ।
