विवेक न्याैपाने
पोखरा महानगरपालिका वडा नं. १५ द्वारा आयोजित अन्तर विद्यालय सडक दौड प्रतियोगिता छात्रतर्फ हिमालय लाइफ नेपालका राज परियार र छात्रातर्फ सिद्ध माविकी श्रेया मगरले जितेकी छन् । संविधान दिवसको अवसरमा आयोजित प्रतियोगितामा वडा भित्र बाट १८ विद्यालयका २५० जना विद्यार्थी सहभागी थिए ।
प्रतियोगितामा छात्रातर्फ सिद्ध माविकै सोनीका परियार द्वित्तीय, भ्यू प्वाइन्ट स्कूलकी सजिना सुनार तृतीय, सिद्ध माविकी रचना चौधरी चौथो बन्न भने केल्स एकेडेमीकी अश्विनी पौडेलले सान्त्वना प्राप्त गर्न सफल भइन् ।
यता, छात्रतर्फ सिद्ध माविका विवश रेग्मी द्वित्तीय, हिमालय लाइफकै विजय विक तृतीय, शुभ तारा थ्री एञ्जल्सका आशिष घले चौथो र सिद्ध माविका विवेक गुरुङले सान्त्वना प्राप्त गरे । विजयी प्रतियोगीले क्रमशः आठ हजार, सात हजार, ट हजार र तीन-तीन हजार नगद पुरस्कार प्राप्त गरे ।
यसअघि कार्यक्रम शुभारम्भ गर्दै पोखरा महानगरकी उपप्रमुख मञ्जु देवी गुरुङले धेरै पहिलेदेखि धेरै संविधान बने पनि ती संविधान जनताको पक्षमा नरहेको र विभेदकारी रहेको कारण जनताको सङ्घर्ष र बलिदानी पश्चात् नेपालको संविधान २०७२ ल्याउन सफल भएको बताउनु भयाे ।उहाँले २०७२ सालको संविधानमा टेकेर नै आज हामी लोकतान्त्रिक गणतन्त्रात्मक शासन व्यवस्था रहेको भन्दै यो संविधानको रक्षा गर्ने, सफल बनाउने र यो शासन व्यवस्थालाई स्थापित बनाउने काम पनि हामी सबैको जिम्मेवारी रहेको स्पष्ट पार्नु भयो ।
वडाध्यक्ष तोरण बहादुर बानियाँले पूर्वाधारमा मात्र सीमित रहेर मानवीय विकास नहुने भन्दै अबको विकास
शिक्षा,स्वास्थ्य,खेलकुद, महिला उद्यमशीलता र युवा स्व-रोजगारलाई जोडे मात्र मानवीय विकास सम्भव हुने बताउनु भयाे ।
वडासदस्य आशिष भण्डारीले संविधान दिवसको अवसर पारेर विद्यार्थीहरू बिच आयोजना गरिएको यस सडक दौड प्रतियोगिताले समाजमा सकारात्मक प्रभाव पार्ने बताउनु भयाे ।
कार्यक्रमको संचालन भने साेही वडाका सचिव प्रमोद गुरुङले गर्नु भएको थियो ।