जन्मभुमि खबर ,
पोखरा ।
पोखरामा आयोजना गरिएको प्रथम महानगर मेयर सम्मेलन– २०७९ ले सातबुँदे संयुक्त घोषणापत्र जारी गरेको छ। आइतबार पोखरामा पत्रकार सम्मेलन आयोजना गरी सो घोषणापत्र सार्वजनिक गरिएको हो।
‘समुन्नत महानगरका निम्ति समन्वयिक विकास र साझेदारी’ भन्ने नाराका साथ शुक्रबार र शनिबार दुईदिन चलेको सम्मेलनमा देशका ६ महानगरपालिकाका मेयर, पाँच महानगरका उपमेयर र प्रशासकीय अधिकृतहरूको सहभागिता रहेको थियो।
दुईदिने सम्मेलनले तयार गरेको सातबुँदे ‘संयुक्त घोषणापत्र’मा महानगर मञ्च नेपाल गठनसँगै महानगरपालिकाहरूका लागि संघीय संसदबाट छुटै ऐन जारी गर्ने, सबै महानगरमा नीति तथा योजना आयोग गठन गर्ने, सबै महानगरमा एउटै संगठन संरचनाको व्यवस्था गर्नेलगायतका विषय उल्लेख छ। अर्को वर्षको सम्मेलन भतपुरमा हुने तय भएको छ।
आयोजक पोखरा महानगरपालिकाका मेयर धनराज आचार्यले सबैको साझा समस्या र चुनौतीका रूपमा फोहाेरमैला व्यवस्थापन रहेको बताए।। फोहाेरलाई कसरी व्यवस्थापन गर्ने भन्नेमा गहन छलफल भएको र यसका लागि साझा अवधारणा बनाएर जाने विषयमा सबै एकमत भएको उनले जानकारी दिए।
सम्मेलनमा पोखराका मेयर धनराज आचार्य र उपमेयर मञ्जुदेवी गुरुङ, काठमाडौंका मेयर बालेन्द्र साह र उपमेयर सुनिता डंगोल, ललितपुरका मेयर चिरीबाबु महर्जन र उपमेयर मञ्जली शाक्य, भरतपुरका मेयर रेनु दाहाल र उपमेयर चित्रसेन अधिकारी, विराटनगरका मेयर नागेश कोइराला तथा वीरगञ्जका मेयर राजेशमान सिंह र उपमेयर इम्तियाज आलम सहभागी रहेका थिए।
यस्तो छ जारी गरिएको सातबुँदे संयुक्त घोषणापत्र
