कोरोनाबाट मृत्यु भएकाको मलामीमा २५ जना मात्र सहभागी हुन पाउने
स्वास्थ्य तथा जनसंख्या मन्त्रालयले दोस्रो लहरको कोरोना संक्रमणले मृत्यु भएका व्यक्तिको शव व्यवस्थापन (मलामी)मा २५ जना सहभागी पाउने जनाएको छ ।
स्वास्थ्य मन्त्रालयले कोभिड संक्रमितको मृत्यु भई शव व्यवस्थापन गर्नुपर्दा जनस्वास्थ्यका मापदण्ड पालना गरी २५ जना भन्दा बढी मलामी सहभागी नहुन आग्रह गरेको हो । सो सम्भव नभएमा नेपाली सेनाले शव व्यवस्थापन गर्ने जनाएको मन्त्रालयले जारी गरेको सूचनामा उल्लेख छ।
संक्रमित व्यक्तिको शव व्यवस्थापन तथा अन्त्येष्टी आफ्नो धर्म परम्परा र संस्कृति अनुसार गर्न सकिने मन्त्रालयको भनाइ छ । यद्यपि २५ भन्दा बढी मलामी नहुने गरी जनस्वास्थ्यका मापदण्ड पालना गरी सहभागी हुनुपर्ने मन्त्रालयले भनेको हो ।